Артыкул 6
О иманью злодея в потрафенью на дорозе.
Коли бы ся кому трафило злодея своего з лицем албо и без лица, с трафунку на дорозе поткавшы албо угонивши, поймати, тогды тот, поймавши, маеть што наблизшым по дорозе той людям околичным, а будет ли поблизу возный, и возному то оповедати и оказати и вести его албо до пана его, албо до нашого, господарского, вряду судового, што наблизшого от того местца, где помаеть , и там собе з ним справедливости доводити. Леч часу права в таких речах при иншых знакох, доводех не менш маеть быти то упатровано, естли же тот, хто жалуеть, тую шкоду свою заразом, кгды ся ему стала, будеть на вряде оповедал и записал, будь менуючы власне того злодея имем, албо менечы, же не ведати, от кого тая шкода в злодействе сталасе.
Артыкул 7
О важности лица, за што злодей горлом маеть быти каран.
Уставуем, иж кождый злодей, з лицом приведеный и правом переконаный, при лицы его, которое бы стояло вышей чотырох коп грошей, маеть горлом каран быти. А которое бы лицо чотырох коп албо менш стояло, а первшый бы раз с тым был пойман, тогды такий тое, што украдено, з навезкою вернути маеть. А не будет ли мети чым навезку платити, тогды на выробок за то злодей будеть выдан: музчызне на рок по копе грошей, а жонце по пятдесят грошей вытручаючы. А потом того ж злодея, естли бы ся трафило кому поймати повторе з лицом, хотя бы тое лицо и дву коп грошей не стояло, тогды вжо дупцы у столпа бит быти маеть, а за шкоды и совитость не будет ли мети чым платити, на выроб, яко вышей описано, выдан быти маеть. А пакли бы и третий раз тот же што украл, тогды вжо и горлом каран будеть. А на довод против такого злодея, з лицом таким, за што горлом каранье описано, приведеного, при иншых поступкох правных шляхтичу одному самому, а ровному з ним чоловеку простому самовторому присега сказывана будеть. А где бы не шло о горло, толко о иншое каранье меншое, то без присеги за сведецством трех або двух чоловеков выконывано быти маеть.
Артыкул 8
Для покою посполитого застановенье от злодейства.
От того часу уставуем и хочем то мети, абы кождый с подданых нашых и с подданых князьских, панских, духовных и свецких, и боярских, так можного стану, яко и меншого, хто бы колвек што в кого на торгу, в дому або где колвек коня, вола, корову и иншые всякие речы купил албо выменял, тогды при такой купли або мене мають быти боришники, люди добрые, вери годние, и с тыми боришники сам тот истец, хто продасть або променяеть, будеть ли се то на торгу стало, заразом до вряду, замку або двора нашого або до вряду нашого местского, звлаща где ест право майдеборское, а трафит ли ся то на торгу в местех князьских, панских, земянских, до самого пана, в небытности паньской — до врядника его, прийти и тую продажу або мену до кгниг сознати, и записати давшы, оный, хто купит або выменяеть, выпис на то собе взяти маеть. А где бы ся купля або мена стала не на торгу, але в дому або где колвек, звлаща в таких местцах, где торги оподаль, миль в чотырох — в пети або и далей, при том также боришники мають быти, а потом тот, хто продаеть, на первшый або на другий торг по той купли або мене маеть з боришники або хотя з одным борышником до близшого местечка, где торг бываеть, ехати и тую продажу або мену сознати. А который купил, выпис собе взяти маеть, а тым выписом, кгды потреба укажеть, маеть собе очыщати, а вряд кождый от такового записанья и выпису не маеть болш брати, толко один грош, от купуючого — полгроша, а от продавцы другую полгроша.
Нижли естли бы хто потом тую реч познал и то перед врядом довел, же то его власная реч, тогды тот, хто первей купил, пенези свои тратить, а тое, што купил, перед врядом маеть оному, хто познал и довел, вернути. А будет ли менити, же при том лицы много погинуло, тогды тот, хто купил, маеть отприсягнутися, иж болшей тых речей не купил, ани о них сведом, и то купил, не ведаючи, жебы мела быть реч краденая. А тот, у которого што познають, пенезей своих маеть смотрети на том, у кого што купил або выменял. А где местечка суть ближей, там подданые нашы, господарские, также духовных и свецских станов селяне на селах, ани в домех своих ничого продавати не мають, але до мест и местечок все, што хотечы своее власности продавати, возити и продавати кождому волно. И купчыки албо торговцы для купованья некоторых речей по селом ездити не мають, леч на торгох и в местечках, где ся кому што трафить, куповати кождому позволяем, чого яко врядники нашы, господарские, так князские, паньские, духовные и земяньские мають постерегати и обволывати, абы за такими покутными сельскими купецствы и торговлями злодейство не множылося.
Артыкул 9
О погоненье следом в якой колвек шкоде покраденой.
Коли бы покрадены кони, волы, быдло и иншые речы в дому и где ж колвек, а тот шкодный понял бы след тое шкоды своее и, собравши людей добрых околичных суседов водле давного обычаю гонил следом, а тот след где бы ку которому селу албо в чый дом привел, тогды маеть послати до того села або до дому, где след вышол, людей добрых сторонних годных веры, абы з села своего и з дому, где бы след вшол, або з кгрунту земли села своего след вывели. Таковое село або в чый дом след будеть вшол мають тот след в тое копы взяти и з села або з дому из зeмли своее того села след вывести аж до иншое границы, куды тот след пойдеть. А если бы тое село, до которого след приведено, от себе следу не вывели або от следу отбили, або, выгнавши, быдлом затоптали, и на таковом застановившися тая капа , где следу не отведено або отбито, мають взяти возного, и с тым возным люди сторонние, копа вся мают оную шкоду осумовати, на чом оный шкодник самотреть присягнеть, менуючи собе шкоду от того села. А кгды присягнеть, тогды оное село тую шкоду винни будуть заплатити, а собе винного искати и по сказанью мають через возного и сторону, которые при том были, обявити то вряду кгродскому того повету и половицу пересуду вряду дати, а вряд маеть рок водле важности шкоды и науки статутовое заплате зложити и тот рок листом своим пану тых людей ознаймити и в том его напомянути, абы тую шкоду людем своим заплатити велел, або, естли о самого его дому копа будеть, сам заплатил. А не станет ли ся в той речи заплата на рок, от вряду зложоный, тогды укривжоная сторона, кгды, позвавши о то сторону противную до вряду кгродского, доведеть того, же тая копа и сказанье слушне вчинено, тот тую шкоду будеть винен совито заплатити. А естли бы укривжоный злодейством хотел шкоды своее доходити копою, тогды вси в той околицы вокол на милю со всих чотырех сторон мають казати подданым своим на копу сходитися. А то ся маеть розумети вперед на тые местца, где досихмест копы не бывали, которые коповища кождый подкоморий в повете своем назначити и села тых, хто ся там становити будеть, описати маеть. А на Руси и инде, где здавна копы бывали, там мають быти и тепер копы отправованы на старых коповищах тым обычаем, яко первей того бывало. А на тых теж местцах, где досел копы не бывали, таковым же порядком и поступком копы збираны и отправованы быти мають, яко ся и на Руси заховывало и заховуеть.
Артыкул 10
Естли бы хто колвек шляхтича оселого або неоселого невинне и без лица о злодейство обвинил.
Уставуем: где бы хто колвек шляхтича так оселого албо и неоселого обвинил о злодейство без лица и кром слушное причины так за позвы, яко и без позву, чоловека доброго, веры годного и неподозреного, тогды таковое обвиненье оному шляхтичу на почстивости и доброй славе его ничого шкодити не маеть, але за таковое обвиненье тот жалобник повинен будеть того шляхтича навезати, яко бы его зранил, и там же на замку або в дворе нашом, где ся тое потрафить, маеть седети дванадцать недель, естли бы тот жалобник был сам шляхтичь. А где бы простого стану чоловек шляхтича тым обычаем, яко вышей описано, о злодейство обвинил, маеть за то у стовпа дубцы бит быти, обволываючи тот его выступ.