Пакли ж бы в таковом обвиненью шляхтича хотя без лица, одно выписом с кгниг пиволанья албо якие слушные причыны и теж знаки на него у права показал и злодейства на него за тым доводити хотел, а тот бы шляхтич обвиненый перед тым николи о тое се еще никому не отводил, ани отприсегал, тогды в таковом обвиненью первшый кроть от того самодин отприсягнутися маеть, яко ему в том не был и не ест шкодником. А по присязе за таковыми знаки вжо ему навезка не маеть быти плачона, ани везенья не повинен терпети. А где бы того ж шляхтича, если оселого — за позвы, а неоселого — и без позву, на вряде нашом судовом также хто о злодейство другий раз тым же обычаем за слушными знаки и вжо за другим поволаньем обвинено было, тогды вжо не самодин, але самовтор з шляхтичом оселым, веры годным, неподойзреным также без навезки того шляхтича поволаного отприсягнутися маеть. А где бы и третий раз того ж шляхтича с причын певных, а не згола, але за третим поволаньем о злодейства хто обвинил, тогды вжо самтретий з шляхтою оселою, людми веры годными и неподойзреными от того отприсягнутися маеть. А естли бы сполна светков не мел, хотя бы одного недоставало, с ким отприсягнутися, тогды за доводом слушным або за присягою жалобника маеть всю шкоду ему заплатити, а собе винного искати. А вед же естли бы того ж шляхты ужо четвертый раз также о злодейство было обвинено за слушными и явными знаки и поволаньем вжо неоднокротным, первей того уделаным, то на него показано и доведено было бы теж и лица при нем не зостали, а сторона поводовая, шляхтичом будучы, самтретей шляхтою, людми знаемыми, тубылцами, вери годными а неподойзреными о тое злодейство его поприсегнула, тогды вжо горлом каран быти маеть яко злодей, а шкода з ыменья або з маетности его рухомое за доводом слушным маеть быти плачона стороне поводовой. А естли бы шляхтич обвинен был от чоловека простого стану, тогды и за четвертым разом чоловек стану простого аж самсем з двема шляхтичы а с чотырма чоловеки собе ровными, неподойзреными поприсегнути его маеть.
Артыкул 11
О обвиненью в злодействе шляхтича, лет зуполных не маючого, также и о простых людях.
Естли бы ся трафило, ижбы шляхтич в летех шестьнадцати, а не болш, обвинен о злодейство або приведен был з лицом, тогды таковому про молодость лет его не маеть быти поличоно за злодейство и не маеть быти до ката в руки и на муку даван. Нижли тую шкоду отец его або матка, або кревные з ыменья части его повинны з навезкою заплатити и, заплатившы, то почстивости его шкодити не маеть. А не будет ли мети чым платити, ино дати его на выслугу, поки бы то заслужыл, што зашкодил, а выслуга маеть быти по копе грошей год. Тым же обычаем можеть розумети и о детях людей простых, лет не дорослых. А вед же таковый хлопец неодрослый , естли бы в колку злодействах и при лицы был дознан, таковых вряд маеть карати водле зданья своего, то ест не горлом, але яким караньем на теле.
Артыкул 12
О поволаньях.
Уставуем, абы поволанья злодейские перед врядом оповеданы и явне высветчоны и до кгниг кождого вряду, где ся тое право точыть будет, а потом и до кгниг кгродских за сознаньем возного и стороны записованы были, которые книги яко перед тым, так и тепер зовуть чорными книгами. Таковое оповеданье и поволанье, врядовне записаное, маеть у права везде местце мети и приймовано быти и кгниги таковые чорные вряд кождый кгродский маеть мети особные, з иншыми справами в одны книги таких речей злодейских не мешаючы.
Артыкул 13
Хто бы злодея приличного, ведомост о нем маючы, в себе в дому ховал. Уставуем и сказуем, иж коли бы хто злодея приличного, ведоме в дому своем албо на именью своем осадивши, домом ховал або мешкати допустил, албо явного злодеи от шубеницы своими пенезми откупил, тогды таковый кождый, естли бы то на него слушным правом переведено было, всю шкоду, котороя бы ся кому через того злодея з ыменья его стала, будеть повинен платити и оправовати. Тым же обычаем, естли бы кому злодея, правом поконаного, на смерть выдано, а он бы не скарал, а потом кому ся колвек от того злодея шкода будеть деяти, тогды тот, хто того злодея пустил, за доводом стороны жалобное, же ся ему от оного злодея шкода деяти будеть, повинен будеть тую всю шкоду платити и оправити.
Артыкул 14
О покраденье свирна або клети паньское и шляхетское и теж клети мужыцкое.
Теж уставуем: кгды бы покрадено которому пану або земенину свирен скарбный або спижарню, а то бы на него правом было переведено, тогды за то повинен будеть заплатити вины дванадцать рублей грошей и шкоду покраденую за присегою оправити. Тым же обычаем, естли бы мужык мужыку клеть выкрал, тогды за покраденье клети мужыку три рубли грошей и шкоду всю з маетности злодейское маеть за присегою плачоно быти. А место навезки за обое такое злодейство тот злодей, або и колко их будеть, мають горлом карани быти.
Артыкул 15
О лицо, которое ся найдеть в дому чоловека неподойзреного албо теж и подойзреного.
Уставуем: кгды бы у чоловека неподозреного всякого стану за замком лицо было найдено, а до тое хоромины было бы окно, до которого могло бы лицо укинено быти и неприхоронено, тогды таковый чоловек, естли будеть неподойзреный, маеть, з жоною и з детьми дорослыми, будет ли их мети, отприсягнутися, а не будет ли жоны або детей, ино с челядью домовою.
Тым же обычаем, кгды лицо застал в чием дому, в гумне або за плотом, по тому ж маеть тот чоловек неподозреный отприсягнутися, иж того не ведал. А естли бы в хоромине за замком было найдено, и хотя б тое лицо было прихоронено, а окно бы у тое хоромины было так великое и замкненьем необварованое, жебы чоловек им улезти мог, то такеж маеть от такового лица обвиненый отприсегнутися. А не будет ли так великого окна або хотя бы и великое окно было, а замкненьем знутра было добре обваровано, то вжо такое лицо маеть быти поличоно за злодейство, с которым кого при том лицы застануть, мает быти веден шляхтичь до вряду нашого, а слуга або человек панский, шляхетский — до пана своего. Пакли ж бы такое лице вонтпливое найдено у чоловека подозреного, то ест первей при лицы яком стоячого албо поволаного, тогды шляхтичь, естли бы четвертый раз, яко о том вышей доложоно, был в такой речи обвинен, вжо водлуг оного ж артыкулу сужон быти маеть. А против простого чоловека за третим разом и при таком лицы довод маеть быти чинен. А за доводом мають быти водлуг права горлом караны, а шкода з ыменья або маетности винного з навезкою плачона будеть.
Артыкул 16
О злодею, которого на злодействе не в дому поймають.
Естли бы злодей был пойман на злочинстве, а не в дому своем, а тые речи краденые в дому еще не были, таковый злодей сам один маеть за тое злочинство каран быти, а жона, дети и домовая челяд от того будуть волни, одно шкода, злодейством его вчыненая, з маетности того злодея за доводом плачона будеть, што бы болш над тое лице украл.