Артыкул 25
О листы заручные.
Теж обецуем и маем давати о беспечность здоровя подданым нашим шляхте за похвалками и звазненьем чиим кольвек противко их на кождого з великих и ровных аж до низших станов с канцляреи нашое листы заручные и закладу на них казати описовати межи шляхтою з обу сторон особ собе ровных; маеть быти заклад або зарука покладана так великая, якое жалобная сторона потребовати будеть, аж до десети тисечей коп грошей. А где бы шляхтич против особы стану вышшого и можнейшого заручного листу потребовал, таковому маеть быти зарука в листе описана, также великая аж до десети тисечей коп грошей. А тая зарука покладана быти маеть в листех заручных о обеспечность здоровя самых особ шляхетских. А хто бы, за похвалкою або звазненьем своим обнесен будучи врядовне листом нашим або вряду нашого заручным, а через тот заклад наш кого сам або з направы своее через кого кольвек иного забил, тогды с права за слушным доводом горлом маеть быти каран без милосердья, хотя бы и на горачом учинку не был пойман. А тое заруки, на листе описаное, половица на нас, господара, до скарбу земского великого князства литовского, а другая половица на дети, потомки або близкие забитого и на именью противного отправлена быти маеть без жадное фолькги. А хотя бы хто и не забил, але предсе ранил або бой через заруку учинил, тот также у заруку упадываеть. А навезку водлуг стану и шкоды за доводом слушным платити будеть повинен. А тое заруки также половица нам до скарбу земского, а другая половица стороне жалобной отправлена быти маеть. А ведь же где бы шляхтич, в заруки попалый, так много маетности лежачое и рухомое не мел, на чом бы тая вся зарука отправлена быти мела, ино, колько ж маетности мети будеть, тое половица до скарбу земского, а другая половица стороне подана быти маеть, а остаток заруки на особе самой водлуг порядку сего статуту отправлено быти маеть. И не маем никому таковых закладов отпускати, а то для завстегненья своволеньства и злости людское и для захованья покою посполитого. А если бы тот, которий заруку вынес, сам або з направы своее через кого кольвек иного забойство або зраненье оному, на кого заруку взял, учинил, тот сам такою ж виною маеть быти каран. А в небытности нашой в здешнем паньстве воеводове и старостове судовые, где книги лежеть, будуть мочи листы заручные под печатьми своими шляхте давати по тому ж, яко вышей ест описано. А на воевод, старост судовых в небытности нашой в том паньстве великом князстве литовском вряд наш земский судовый листы заручные и кромя роков судовых шляхте давати маеть под такими ж заклады. Ведь же то предсе варуем, иж где бы и по вынесенью заруки трафилосе то, жебы слуги, бояре, подданые обеюх сторон где на торгу, на дорозе або в корчме, в небытности панов своих повадившисе, промежку себе забойство або бой, раны одна сторона другой учинила, ино одна сторона другой под заруки не подлегаеть, одно справедливости неотволочное поступком права доводити собе мают. А естли бы которая сторона при обжалованью своем того правне довела, иж самой особе его обельживость, зраненье, бой альбо забитье сталосе, особе, убеспечоной заклады, тогды позваный где бы слушный довод противко нему не показалсе, близший будеть отприсегнутисе, же то без росказанья и ведомости его сталосе. Вед же с тых слуг и подданых своих, которые помененый о тот выступ маеть ставити на том вряде, и заразом справедливость з них укривжоной стороне чинена от вряду быти маеть, и подле заслуги коранье онесуть с того ж вряду. А где бы шло не о тую особу, которим заклады служать, але о слуги и подданые, жебы се таковый бой або забойство стало з волею оного, тогды за доводом и переконаньем правным навезка и головщизна трояко маеть быти плачона водлуг стану кождого с таковых укривжоных.
Артыкул 26
О отповедникох неоселых.
Теж уставуем: хто ж колвек неоселый, будь тубылець панства нашего, великого князства литовского, яко и чужоземец, кому теж кольвек иншому отповедь обличне або через лист, або теж заочне учинил, таковый отповедник мает быти поставлен через заказанье от нас, господара, або вряду замкового або земского перед правом, где бы колвек при котором вряде то се деяло. И естли бы тот оное отповеди перед врядом на него довел водле права, то ест будь то писмом его властное руки або сведецством трох або двух шляхтичов, тогды таковый отповедник неоселый маеть быть на замку нашом посажон и седети маеть дванадцать недель. А вед же, и выседевши дванадцать недел, не маеть быти с того везеннья выпущон, аж первей себе рукоемством уистить, абы тот, против кого отповедь чинил, в покою от него был. А где бы жалобник доводу писмом або светками на тую отповедь мети не мог, а ку присязе бралсе, тогды обжалованый близьший будеть отприсегнутисе и от того волен быти маеть, же ему не отповедал.
Артыкул 27
О листех железных, кому мають быть даваны.
Теж уставуем, иж листы железные с канцляреи нашое не мають быти даваны тым, которые маетности свои на збыткох марне утратили и за токовыми збыточными утратами в долги попали, але тым маем давати таковые листы, которые в долги пришли и в убоство попали з божего допущенья, то ест ижбы огнем погорели або маетности их стонули, або бы от розбою, або от непрыятеля нашего забраны были, або хто бы теж для речи посполитое ку утрате и убоству и ку долгом пришол, также купцом и иным людем упалым, окром жидов. Вед же дальшого часу волности не маем тыми листы узычати и давати, толко в наболшой речи и суме тры годы. А в том часе маеть се тот о заплату старати. А вед же кому быхмо хотели такового листу железного узычати, тогды с канцляреи нашое тот маеть быти отослан до вряду нашого належачого, откуль ест, перед которым врядом хто такового листу железного потребуеть, маеть рукоемство слушное поставити людей добрих, оселых и уиститися ими и их маетностями, иж не зникнеть в тых летех, яко на листе ему назначоно. А на остатни день выстья року будуть повинни рукоими оного на том же вряде поставити, а должники долгов своих и оного истца в того вряду упоминатисе, найдовати и доходити будуть. А естли бы рукоими не поставили, тогды сами за листы або за доводом правным тые долги повинни будуть платити. Вед же где бы в том часе на листе замероным тот чоловек должный умер, тогды поручники, доведши того выписом врядовым, под которым такий должник умреть, в той речи вольни будуть. А тые, кому што винно будеть, мають долгов своих смотрети на маетности оного змерлого должника своего водлуг права, которое до того мети будуть.
Артыкул 28
Кому бы шло о честь, яко борздо справедливость учинена быти маеть.
Теж обецуем и будем повинни кождому с подданых наших, кому бы шло о честь, прудкую а неотволочную справедливость учинити на первшом близкопришлом сойме великом вальном с паны радами нашими великого князства литовского без всякое отволоки. А естли быхмо на первшом сойме для затрудненья справ речи посполитое того судити не могли, ино вжо на другом сойме конечно то скончити маем. А до розсудку нашого вшелякая примовка або обвиненье почстивости оного обвиненого ничого не маеть шкодити. А хотя бы умер або забит был, не дождавши того розсудку нашого, тогды то ему, ани потомком его ничого шкодити не маеть, и з службы нашое, господарское, и земское таковые приганеные не мають се вымовляти.