Артыкул 4
О то, што бы ся стало на торгу албо на ярмарку и празнику.
Розумеючы быти не меншый пожыток нам и подданым нашым с торгов и ярмарков, которые в том панстве нашом бывають и для того варуючы, абы такие згромаженья людские в покою и безпечности доброй заховани были, уставуем: кгды бы хто у кого што на торгу украл, а с тым лицом заразом на горячом учынку пойман был, албо бы што в кого перед тым краденых речей на торгу познано, албо бы який збыток, кгвалт, бой, раны, забийство вчынено, ино, станет ли ся то в месте нашом под врядом судовым, в том ся стороны и вряд наш заховати мають, яко о том вышей в артыкуле втором сего ж розделу описано. А трафит ли ся пойманье з лицом албо забийство, где о горло пойдеть, на торгу албо на ярмарку и празнику в ынших местех нашых не под урядом судовым албо теж в местех князских, паньских и земяньских, тогды, не может ли быти при том возный, и перед вижом того вряду нашого або того пана, будь теж врядника его, в чыем ся то местечку станеть, маеть быти такий иман и до везенья в замку або в дворе тамошнем сажон, и где бы се то стало межы слугами або поддаными шляхетскими, звлаща в том одном повете оселых, албо бы наш подданый господарский шляхетского чоловека обвинил и осадил, а шло бы о реч такую, за што горлом карають, тогды жалобная сторона, способившы собе возного и сторону, маеть того обвиненого, будь того ж дня або назавтрее, а надалей дня третего або четвертого, взявшы с того везенья торгового, вести з возным и з стороною, где всхочеть, албо до вряду нашого судового в том же повете, албо теж до пана того, чий чоловек будет, и там собе справедливости доводити. А естли через чотыри дни тот, хто посадить, а того вязня своего з везенья такового торгового не выйметь без слушных правных причин, тогды тот вряд маеть его доброволне, толко взявши собе потуремное, выпустити. А тот вязень потом навезки водлуг стану своего, яко бы бит был, за зельженье и вязенье свое, также и того потуремного и теж шкод, естли бы ся ему за тым иманьем и саженьем якие стали, будеть мочи на том, хто его был посадил, позыскивати перед тым же врядом. И для того тот вряд, беручы обвиненого до везенья, маеть теж и того жалобника албо везеньем, албо парукою доброю опатрить, яко бы и обвиненому в такой мере, як вышей описано, справедливость не гинула. А будет ли обвинен в таких речах крвавых наш подданый иншого присуду, а не того, где торг будет, от шляхетского чоловека, ино тот жалобник так же ся маеть заховати и вести его до того врядника нашого, в чыем присуде ест, толко бы в том же повете, и там собе права доводити. А выкупати з везенья того первшого торгового тот маеть, хто дасть осадити, по тому, яко о том в розделе четвертом доложоно, а потом тое шкоды на виноватом смотрети. Если бы кривда якая на торгу, будь в речах крвавых або иншых менших сталася чоловеку, на торг приезджому, будь нашым або шляхетскым подданым от людей оного двора, где торг будет, с таковыми тот вряд справедливость неотволочную што наборздей чынити повинен будеть. А приеждчый чоловек, нашь або шляхетский, учинит ли кривду чоловеку оного вряду, где торг ест, тот там же маеть быти до везенья осажон. И будеть ли вина в речи крвавой, то нашого подданого до врядника нашого, под чыим присудом будеть, а шляхетского чоловека до вряду кгродского або теж до пана его, яко похочеть, вести и там собе справедливости доводити будеть. А в речах менших, не крвавых маеть о нашом подданом вряднику нашому, а о шляхетском — пану его або в небытности панской вряднику знати дати. А врядник наш або шляхтичь, сами приехавшы або через посланцов своих, мають таких обвиненых с тым же врядом, под которым ся што на торгу станеть, сполне судити и винных карати. А не приедет ли, ани пришлеть врядник наш або шляхтич ку тому праву, ино вжо тот пан або врядник оного двора, где торг был, взявши к собе на тое право возного и двух шляхтичов, земян нашых, господарских, мает такую речь судити и сказовати и до заплаты винного у везенью держати. Вед же такие поступки, вышей описаные, мають ся заховати межи обовательми того ж одного повету, в котором тот торг або ярмарок будеть. А што ся дотычеть купцов и инших людей чужоземских албо и тубылцов и инших людей приеждчых з ыншого панства або теж и з сего панства, але з ынших поветов далеких за колкодесят миль, таким в кривдах их на том же вряде, где ся што на торгу станеть, за обосланьем от того вряду оного пана, чий слуга або чоловек в чом обвинен будеть, справедливость чинена быти маеть. Также и с таких людей здалека приезджих, кому бы колвек в чом кривду на торгу учинили, тот же вряд, под которым ся на торгу што станеть, даючи о том паном их знати, звлаща естли бы обвиненые того потребовали, и рок водлуг далекости местца, як зехати можеть, паном их складаючи справедливост чинити водлуг статуту и порадку, о том вышей, в розделе четвертом описаного. А естли бы шляхтич на таком торгу не судового местца який збыток учинил, тогды о то з оселости позыван будеть, вынявши то, естли бы был в речи крвавой, за што горлом карають, на горячом учынку пойман, такого до суду кгродского вести мають. А неоселые шляхта и за меншие выступки, хотя не крвавые, могуть быти иманы, вед же ку росправе ведены до суду кгродского.
Артыкул 5
Яко маеть в дому чием лицо застати.
Уставуем: хто бы хотел в чием дому шляхетском так на селах, яко и в местех речи краденые застати, тогды, взявши возного и к тому людей сторонных веры годных, и при них в оном дому тых речей краденых искати маеть. А скоро бы там што з речей краденых нашол и кого при лицы застал, маеть при том же возном и людех сторонних у того, кого при лицы зостанет, выведатися, откуль тые речы в дом его досталися. А потом, осветчивши возным и стороною, того шляхтича до кгроду позвати маеть. А естли никого не застанеть, одно лицо знайдет, однако ж с тым лицом маеть ехать до вряду нашого и там далей подле права поступовати. Пакли бы хто в своем дому крадежу искати не допустил, клетей и инших домовыхсхованей отомкнути не хотел або от лица отбил, або лице и злодея отнял, тогды тот, хто то учинить, будеть повинен тую всю шкоду стороне жалобливой платити водле доводу або присеги. Тым же способом, хто бы хотел в чиего чоловека крадеж застати, маеть ся заховати, яко вышей написано. Нижли толко з возным и з стороною, опустивши дом подданого его, мает того пана або врядника, а не будеть ли врядника, ани тивуна , ино старшого, хто в том селе будеть, обослати оповедати тое, абы не розумел кгвалтовного наеханья. И естли ж бы пан або врядник его при том обыйску быти не хотел, тогды сторона жалобливая предся с тыми, кого маеть при собе, обыйск вчинити и вси схованья трясти и, нашодшы, с тым до того двора пана его, ку которому тот чоловек належить, вести мает.