Таковое празднество духовно, и сихъ торжество святыхъ угодно, таковое совокупление преподобнымъ любовно. Сице же празднующе празднество могут глаголати ко святымъ пророкомъ: «Радуйтеся, праведнии, о Господе»,[4] «праведнымъ подобаетъ похвала».[5] И паки: «Веселитеся о Господе и радуйтеся праведнии».[6] И паки: «В память вечную будетъ праведникъ».[7] О таковых торжественицехъ Соломонъ вопиетъ: «Похваляему праведнику возвеселятся людие»,[8] безсмертие бо есть память его, яко от Бога познавается и от человекъ, угодна бо бе Господеви душа его. А иже празднуя и чрево наполняя, и веселит различными брашны и пияньству желаетъ, и прочая злы детели сотворяетъ, таковыхъ праздникъ недуховенъ, но плоторабенъ. Паче же реку таковыхъ празднество июдейско и еллиньско, а не християньско, сия вещь всякой злобе начало. Сего ради бодрено воспрянемъ от злобъ наших, яко от сна тяжька, празднуемъ благочинно, помолимся Богу неленостно, да осияет насъ свыше Божия благодать. Аще убо благо свыше от Бога человекомъ даруется, понеже «всяко даяние благо, и всякъ даръ совершенъ»[9] свыше сходит, Отчимъ советомъ посылаемъ на сыны человеческия, ищущих его всякими делы праведными и чистымъ житиемъ; той светъ «просвещает и освящаетъ всякаго человека, грядущего в миръ».[10]
Что ино сладчайши таковаго света или сего вкусившимъ, рекше разума иже о Бозе. Темъ и Давида глаголюща слышимъ: «Светъ восия праведнику»,[11] и паки: «Просвещаеши ты дивно от горъ вечныхъ»,[12] и паки: «Посли свет твой и истинну твою».[13] И паки: «Во свете Господни узрим светъ»[14] трисоставный и неразделимый; лице же трисоставенъ, существомъ и естеством неразделимъ. Како же сей узрим? Яве есть, яко имъже образом Давидъ глаголетъ къ Богу: «Во свете твоемъ узримъ светъ», рекше: въ Дусе — Сына.
Сего горняго света невечерняго, благожелаемаго трисиятелнаго, безмернаго, неугасимаго, идеже гласъ и радость празднующихъ есть, веселящихся дуси и душа праведныхъ, таковаго света вожделе видети и работати ему сей преподобный старецъ, Божий человекъ, верный рабъ, подвижник Христовъ, страдалецъ Спасовъ, славный в чюдесехъ, чюдный во иноцечъ, дивный житиемъ своимъ, благоукрашенный нравомъ, целомудреный смисломъ,непоколебимый умомъ, пастве учитель, постником слава и преподобнымъ утвержение, непрелестный наставникъ, всеблагий наказатель, истинный кормникъ, благоподатный врачь, изящный предстатель, трудолюбный подвижникъ, иже купи себе Царство Небесное милостынею нищихъ и помилованием убогих, обрете вечную славу, правдою житие некончаемо, чистотою венецъ славы, кротостию в рай вхождение, молитвою со аггелы пение купно, трудомъ покой, и бдением лице невидимаго Бога, постомъ и жаждею вечных благъ наслаждение. Что таковаго разума лучши, что сего ума светлейши, что сего смысла мудрейши?
Самъ бо Владыка Небесный Царь коснуся чистаго сердца его и беззлобивыя кроткия души его и отверзе ему сокровище своея благодати, в не же вшедъ, обрете три камени честны: веру, упование, любовь, от нихъже исплете себе многоценный венецъ и принесе къ Царю царюющим и Господу господьствующимъ. И таковыми добродетельми спеющи, яко маслина плодовита в дому Божии, яко древо саждено при исходящихъ водъ духа, еже плодъ свои дастъ во уреченное время.
Кто же сей, и откуду намъ таковое светило возсия, великое солнце, светлая луна, прекрасная заря, утреняя звезда, пастырь добрый, слепымъ благочестия вождь, благихъ даровъ обогатителю, милостивый любовный священный чиститель, столпъ терпения, старостию почтенный, сединами украшенный, образомъ благолепный, весь духовенъ яко жилище и сосудъ Святаго Духа; иже яко в ризу злату во благия добродетели одеянъ, облеченъ благолепием и украшенъ Духа Святаго дарованиемъ; не толико небо испещренно светозарными звездами, яко сего боголюбивая душа благими добродетельми украшена, — равноаггельный отецъ, Русской стране светилникъ?
К нимъже отвещаю: приступите ко мне вси вжелеющии слышати, протягните слухи вашя, внемлите глаголемымъ мною. Повемъ вамъ всемъ, боящимся Господа, елика слышахомъ и разумехомъ я и отецъ нашъ преподобный Антоний поведаше намъ, и отверзу уста своя, да словесы удобренную и украшенную истинну съ Богомъ и того изложу благодатию, еиже слава внутрь облистающи иже прочитающих и слышащих с подобною чистотою и смущающих помыслъ отложениемъ просвещает бо лучами. Реку же к вам мое слово о святем Антоние именуемъ, и повем вамъ, братие, повесть дивну, еже слышах от преподобнаго. Поведа ми, отходя жизни сея, рече ми: «Се ныне, чадо Андрее, приближается конецъ жизни моея», и ина многая изрече о преставлении своем: «и ныне вся ти известно сотворю еже о моей худости».
8