Шедше же братия ко архиепископу Нифонту с преподобным Антониемъ, бе бо в то время ему святительский престолъ держащу, и възвещаютъ ему о вещи. Святитель же Нифонтъ велми радъ бысть благому совету ихъ, бе бо любляше преподобнаго за премногую его добродетель; и поставляетъ преподобнаго во дияконы, потомъ же во священницы, та же и игуменомъ.
И поживе преподобный в ыгуменьстве летъ шесть на десять в добре исправлении и упасъ стадо Христово. И, уведевъ преподобный свое отшествие к Богу, призвавъ мя и нарече мене себе отца духовнаго, и добре исповедавъ со слезами. И поведа моему окаяньству преподобный свое пришествие из Рима, и о камени, и о сосуде древяномъ — о делве, сиречь о бочке, еже исперва писано. И повеле ми вся сия по преставлении своемъ написати и Церкви Божии предати, чтущимъ и послушающимъ на пользу души и на исправление добрыхъ делъ, в славу и честь Святей и Живоначалней и Неразделимей Троице, Отцу и Сыну и Святому Духу, и Пречистей Богородице. Мне же о сем в велице удивлении бывшу.
Преподобный же Антоний призва братию и рече имъ: «Братия моя и спостницы, молю убо васъ, се ныне отхожду от жизни сея ко Господу Богу моему Исусу Христу, да молите за мя Бога и Пречистую Богородицу во преставлении моемъ, да измут милостивии аггели душю мою и да избегнусетей вражиихъ и от воздушныхъ мытарствъ вашими святыми молитвами, понеже грешенъ есмь. Вы же изберите себе на игуменьство от братии на мое место отца и учителя, и пребудите у него въ посте и в молитве, и в трудех, в пощениих и во бдениихъ, и въ слезахъ, еще же и в любви меж себе, и в послушании ко игумену и ко отцемъ своим духовнымъ и ко старейшимъ братии, писано бо есть: „Блажени нищии духомъ, яко тех есть Царство Небесное; блажени плачющиися, яко тии утешатся; блажени кротцыи, яко тии наследятъ землю; блажени алчющии и жаждущии правды ради, яко тии насытятся; блажени милостивии, яко тии помиловани будут; блажени чистии сердцемъ, яко тии Бога узрятъ; блажени миротворцы, яко тии сынове Божии нарекутся; блажени изгнани правды ради, яко техъ есть Царство Небесное; блажени есте, егда поносятъ вамъ, и изженутъ вы, и рекут всяк золъ глаголъ на вы лжуще имени моего ради; радуйтеся и веселитеся, яко мзда вашя многа есть на небесехъ"».[27] И ина многая преподобный наказавъ братии, поучивъ яже ко спасению. Братия же, видевше преподобнаго в последнъмъ издыхании, быша в велицемъ умилении, и в сетовании, и въ слезахъ многахъ, и рекоша: «О, добрый нашъ пастырю и учителю, се ныне уже зримъ тя впоследнемъ издыхании на кончине века. И ныне к кому прибегнемъ, и от кого насладимся медоточных словесъ учения, и кто попечется о наших грешныхъ душахъ? Но молимъ тя, угодниче Спасовъ, аще обрящеши пред Богомъ милость по отшествии своем от жизни сея, моли о насъ неослабно Бога и Пречистую Богородицу. И здеся, господине, избери намъ игумена от братии нашея, якоже годе твоей святыни, понеже тебе вся нашя духовная тайна известна».
Преподобный же Антоний, избираетъ на игуменьство и благословляетъ нашю худость, понеже быхъ ему исперва ученикъ и потомъ отецъ духовный, како пасти христоименитое стадо. И впредь полагаетъ преподобный братии заповедь, аще лучится избрати игумена, но избирати от братии, иже кто на месте семъ терпитъ. И аще князь нашлетъ игумена или епископъ по насилию или по мзде, и техъ преподобный проклятию предаетъ; таже и о земли утвержая и глаголетъ: «О, братия моя, егда седохъ на месте семъ, купилъ есмь село сие и землю и на реце сей рыбную ловитву на строение монастырю, ценою изъ Пречистыя сосуда, сиречь из бочки. И аще кто начнетъ обидети васъ или наступати на сию землю, ино имъ судитъ Мати Божия».
И давъ братии прощение и о Христе последнее целование, и ставъ на молитве и помолився на многъ часъ, аще убо и радостно тому бяше еже разрешитися от плоти и со Христомъ быти, но показуя, яко всем страшно чаша смертная и многия же по воздухомъ истязателя имамы, паче же смирениемъ ведыйся, помолися к Богу сице глаголя. Молитва. Явися, Господи, и помози ми и избави мя от руку князя и власти и миродержителей тмы, да не покрыетъ мене темный тех воздухъ, ниже дымъ ихъ помрачитъ душю мою; укрепи мя, Господи мой, Господи, да прейду огненныя волны и глубины бездонныя, яко да не потопленъ буду в нихъ, да не обрящетъ врагъ оклеветати мя, но да прейду миродержителя и лукаваго вожда ихъ, и от темныхъ князь и тартаръ избавленъ да буду; и тако да явлюся пред тобою чистъ и непороченъ и восприиму тобою обещанная благая святымъ твоимъ.