А у Бинедарьского князя 300 слонов да сто тысяч рати /л. 455 об./ своей, а коней 50 тысяч у него. Султан выехал из града Бедеря восмой месяць по Велице дни, да с ним возырев выехало 26 возырев, 20 возырев бесерменскых, а 6 возырев индийских. А с султаном двора его выехало сто тысяч рати своей конных людей, а двесте тысяч пеших, да 300 слонов з городки да в доспесех, да сто лютых зверей на двою чепех. А з братом салтановым вышло двора его 100 тысяч пеших людей, да 100 слонов наряженых в доспесех. А за Малханом[239] вышло двора его 20 тысяч конных, а пеших 60[240] тысяч, да 20 слонов наряженых. А з Бездерханом вышло 30 тысяч конных, да и з братом, да пеших сто тысяч, да слонов 25 наряженых с городки[241]. А с Сулханом вышло двора его 10 тысяч конны, а пеших 20 тысяч, да 10 слонов з городки. А с Возырханом вышло 15 тысяч конных людей, да пеших 30 тысяч, да 15 слонов наряженых. А с Кутовалханом вышло двора его 15 тысяч конных, да пеших 40 тысяч, да 10 слонов. А со всяким возырем по 10 тысяч, а с ыным 15 тысяч конных, а пеших 20 тысяч. А с ындейским авдономом вышло рати своей 40 тысяч конных людей, а пеших людей сто тысяч, да 40 слонов /л. 456/ наряженых в доспесех, да по 4 человекы на них с пищалми. А с султаном вышло возырев 26, а со всякым возырем по десяти тысяч рати своей, а пеших 20 тысящ, а с ыным возырем 15 тысяч, а конных людей и пеших 30 тысяч. А Индейский[242] 4 возыри великих, а с ними рати своей 40 тысяч конных людей, а пеших сто тысяч. И султан ополелся на индеян, что мало с ним, и он еще[243] прибавил 20 тысяч пеших людей, двесте тысяч конных людей, да 20 слонов. Такова сила султанова индейского бесерменьского Маметь дени Иариа, а раст дени худо донот; а правую веру бог ведает, а праваа вера бога единого знати, и имя его призывати на всяком месте чисте чисто.
В пятый же Велик день възмыслих ся на Русь. Идох из Бедеря града за месець до улубагряма бесерменьского Мамет[244] дени розсулял, а Велика дни кристьанского не ведаю Христова въскресения, а говейно же их говех з бесермены, и розговехся с ними, и Велик день взял в Кельбери от Бедери 10 ковов.
Султан пришол да Меликътучар с ратию[245] своею 15 по улебагряме, а в Келбергу; и война[246] им не удала[247], один город взял /л. 456 об./ индийской, а людей их много изгибло, и казны много истеряли. А индийскый же салтан кадам велми силен, и рати у него много, а сидит в горе в Бичинегере. А град же его велми велик, около его три ровы, да сквозе его река течет; а со одпу[248] страну его[249] женьгель злый, а з другую страну пришол дол, и чюдна места велми угодна все, на ону же страну приитти некуды[250], сквозе градо дрога, а града же взяти некуды, пришла гора велика да дебер зла тикень. Под городом же стаяла рать месяць, и люди померли безводни, да голов велми много изгибло з голоду да з безводицы; а на воду смотрит, а взяти некуды. А град же взял индийской Меликъчан хозя, а взял его силою, день и нощь бился з городом 20 дни, рать ни пила, ни ела, под городом стояла с пушками; а рати его[251] изгибло пять тысяч люду доброго, а город взял, ини высекли 20 тысяч поголовья мужского и женьского, а 20 тысяч полону взял великого и малого, а продавали[252] голову полону[253] по 10 тенек, а робята по две тенкы[254], а казны же не было ничего, а болшего города не взял.
А от Кельбергу поидох до Кулури; а в Кулури же /л. 457/ родится ахикь, и ту его делают на весь свет, оттуду его розвозят; а в Курили же алмазников триста, сулях микунет. И ту же бых пять месяць, а оттуду же поидох Калики, ту же бозар велми велик; а оттуду поидох Конаберга; а от Канаберга поидох к шиху Аладину; а от шиха Аладина поидох ко Аменьдрие; и от Камендрия к Нарясу; и[255] от Кинаряса к Сури; а от Сури поидох к Дабыли, пристанище Индийского моря.
Дабил[256] же есть град велми велик, а к тому же Дабылп, а[257] съезжается вся поморья Индийская и Ефиопская. Ту же окаянный аз, рабище Афонасей бога вышнего, творца небу и земли, възмыслихся по вере по кристьянской, и по крещении Христове, и по говейнех святых отець устроеных, по заповедех апостольских, и устремихся умом поитти на Русь; и внидох и зговорих о палоне[258] корабленем, а от[259] своеа главы[260] два златых до Гурмыза града доити.