Прииде же Макарий игумен от Великаго Новаграда в осенное время. Старец же Иона с прочими уже совершиша церковь без него. Игумен же Макария совещася з братнею, и тако совершивше священство, и собравше окрест ту сущих весей со святыми иконами и честными кресты. И тако соборне освящают храм той во имя Пресвятыя Богородицы честныя ея Похвалы в лето от создания мира 7116 (1608) в славу Богу и Пречистей его Богоматере. Прежепомянутый же он древодель Ияков, емуже явися Святая Богородица в Корельстей земли, по совершении тоя церкви прият иноческий образ, пострижеся в томже монастыре, и наречен бысть Иоаким, и бысть инок искусен. Такоже и прежереченнии они христолюбивии мужи, иже видения поведавшей на святем месте том, мнози постригошася от них в монастыри том и быша искусни иноцы. И тако собрася братство о Господе.
От иконы же Пресвятыя Богородицы начаша бывати многая и неисчетная чюдеса и исцеления с верою приходящим, ихже поряду и списати не мощно есть множества ради. От нихже мало нечто повем любви вашей.
Чюдо третие. Некая жена именем Ирина от веси, нарицаемыя Цымола, бысть же ей явление некое божественно. Прииде убо она ко иерею церкви чюдотворца Николы Волока Пенежскаго именем Григорию, поведа ему, яко да идет с честными кресты, и со святыми иконами, и с народом в монастырь Пречистыя Богородицы к чюдотворному ея образу и молебная совершит. Иерей же Григорий не внят словесем ея, и нивочтоже вменив о глаголех ея, и не восхоте ити. В то же время абие внезапу сотворися воздух неблаготворен, и бысть мраз на все плодие, и позябе все сеянное на нивах. Того же иерея Григория Божия некая сила верже о помост церковный[4490], и бысть яко мертв. И по мале едва некако в чювство прииде. И взем честныя кресты, и со множеством народа идоста в монастырь Пресвятыя Богородицы, и тамо молебная совершивше, и отъидоша в домы своя. И абие в той час милостивый Господь наш Исус Христос молением Пречистыя Матере своея Пресвятыя Владычицы нашея Богородицы и Приснодевы Марии паки дарова теплоту солнечную, и дождь благопотребен, и воздух благотворен ко умножению плодов земных. Вси же людие видевше чюдо сие и прославиша Бога и Пречистую Богородицу. Доздеже о сем.
Чюдо 4. Ино чюдо поведаю вам. Человек некто именем Михаил, прозванием Ворга, живый во единой от окрестных ту сущих весей, иже Сояла наричется, близ тоя великия горы. Нача же Михаил той поносити глаголы хулныя на место сие святое и на мнозе не преста от обычая того. Бысть же сице. Случися ему некоея ради крамолы яту быти от епарха страны тоя, и всажену быти в темницу, и мучен бысть крепко, потом же и на смерть осудиша его. Прииде же ему во ум, и воспомяну грех свой о поношении святаго места сего, воздохнув из глубины сердца своего, моляся Богородицы и глаголя: «О Пресвятая Госпоже моя, Владычице Богородице! Прости мя грешнаго о поношении моем на место святое твое, отселе уже никакоже не дерзну рещи ничтоже, токмо избави мя от напасти сея и от горкия смерти. Имам же и приношение приносити в дом твой до дне смерти своея». И тако милостию Пречистыя Богородицы избавлен бысть от осуждения того и горкия смерти тоя. Нача же и приношение приносити по обещанию своему на всяко лето по мере жита. Се же нам сам поведа.